آپ کُوں کَل اِک خواب اِچ ڈیٹِھم
اپنڑے اُچؔے ٹَھلے دی اِک چُنڈ تے کھڑ کے
شہر دے کُتے کَٹھے کر کے
ہڈیاں میں ورتیندا کَھڑاں
کُتیاں کُوں ہڈیاں پیندا کَھڑاں
ہر کُتا اِک ہڈی کھاندے
پُوچنڑ مار کے میڈے پیراں دے وِچ ڈھاندے
کَونکاں مار کے میڈے ناں دے گاونڑ گاندے
جیلے چھبؔا خالی تھیندے
کُتے میکوں بھونکنڑ لگدِن
میڈے کپڑے پھاڑ کے میتھوں بوٹیاں مَنگدِن
کل تعبیر ڈساونڑ والے بُڈھڑے بابے
میڈی کَنڈ کُوں تھپکی ڈے کے کِھل کے آکھے
بَچڑا کُتے کُتے ھوندِن
نَسلاں جاننڑ کولُوں پہلے ہڈیاں نا ورتائیاں کرو
یاریاں سوچ کے لائیاں کرو
